Gedeon Richter

Kavinton ampul 2ml

Azərbaycan Respublikası

Səhiyyə Nazirliyi

Farmakoloji və Farmakopeya

Ekspert Şurasının tərəfindən

14.09.2017-ci il tarixdə

TƏSDİQ EDİLMİŞDIR

Dərman vasitəsinin istifadəsi üzrə təlimat (xəstələr üçün)

KAVİNTON 5 mq/ml venadaxili infuziya üçün məhlul

CAVINTON®

Tərkibi

Təsiredici maddə: 1 ml məhlulun tərkibində 5 mq vinposetin vardır.

Köməkçi maddələr: askorbin turşusu, natrium metabisulfat, çaxır turşusu, benzil spirti, sorbitol, inyeksiya üçün su.

Təsviri

Rəngsiz və ya cüzi yaşıl rəngli şəffaf məhluldur.

Farmakoterapevtik qrupu

Psixostimullaşdırıcı və nootrop maddələr.

ATC kodu: N06B X18.

Farmakoloji xüsusiyyətləri

Farmakodinamikası

Vinposetin kompleks təsir mexanizmli birləşmə olub, baş beyinin metabolizminə müsbət təsir göstərir və onun qan təchizatını və qanın reoloji xüsusiyyətlərini yaxşılaşdırır.

Vinposetin neyroprotektiv effektlər göstərir: preparat stimullaşdırıcı aminturşular vasitəsilə törənən sitotoksik reaksiyaların zərərli təsirlərini zəiflədir.

Preparat potensialdan-asılı Na+ və Ca+ kanallarını, həmçinin NMDA və AMPA reseptorlarını inhibə edir. Preparat adenozinin neyroprotektiv effektini gücləndirir.

Vinposetin serebral metabolizmi stimullaşdırır: preparat qlükoza və O2-nin tutulmasını və baş beyin tərəfindən bu maddələrdən istifadə edilməni gücləndirir. Preparat baş beyinin hipoksiyaya qarşı davamlılığını artırır, qlükozanın - baş beyin üçün yeganə enerji mənbəyinin – hematoen-sefalik baryer vasitəsilə daşınmasını gücləndirir, qlükozanın metabolizmini energetik baxımdan daha əlverişli olan aerob yola yaxınlaşdırır, seçici olaraq Ca2+- kalmodulin-asılı ferment olan sQMF-fosfodiesterazanı (FDE) inhibə edir, baş beyində sAMF və sQMF-nin səviyyəsini artırır. Preparat ATF-in konsentrasiyasını və ATF/AMF nisbətini artırır, baş beyində noradrenalin və serotoninin dövriyyəsini gücləndirir, qalxan noradrenergik sistemi stimullaşdırır, antioksidant aktivlik göstərir. Vinposetin yuxarıda sadalanan effektlərin təsiri nəticəsində serebroprotektiv təsir göstərir.

Vinposetin baş beyində mikrosirkulyasiyanı yaxşılaşdırır: preparat trombositlərin aqreqasiyasını inhibə edir, qanın patoloji yüksəlmiş özlülüyünü zəiflədir, eritrositlərin deformasiya olunma xüsusiyyətini artırır və adenozinin zəbt olunmasını inhibə edir, O2-nin eritrositlərə affinliyini azaltmaqla toxumalarda O2-nin daşınmasını yaxşılaşdırır.

Vinposetin baş beyində qan dövranını seçici olaraq artırır: preparat ürəkdən qovulan qanın serebral fraksiyasını artırır, sistem sirkulyasiyası parametrlərinə (arterial təzyiq, ürəyin qan qovma funksiyası, nəbzin tezliyi, ümumi periferik müqavimət) təsir göstərmədən, baş beyində damar müqavimətini zəiflədir; preparat “oğurlama effekti” əmələ gətirmir. Bundan başqa, preparatdan istifadə fonunda perfuziya dərəcəsi aşağı olan zədələnmiş (lakin hələ nekrozlaşmamış) işemiya ocaqlarına qanın daxil olması yaxşılaşır (“əks oğurlama effekti”).

Farmakokinetikası

Paylanması: Siçovullarda preparatın peroral yeridilməsi ilə aparılan tədqiqatlarda radioaktiv-nişanlanmış vinposetin daha yüksək konsentrasiyalarda qaraciyər və mədə-bağırsaq traktında aşkar edilmişdir. Toxumalarda maksimal konsentrasiyaları preparatın istifadəsindən 2-4 saat sonra aşkar etmək olar. Baş beyində radioaktiv nişanlanmış maddənin miqdarı qanda olan konsentrasiyadan yüksək olmamışdır.

İnsanda qan zülalları ilə birləşməsi 66%-dir. Vinposetinin mütləq peroral biomənimsənilməsi 7% təşkil edir. Paylanma həcmi 246±88,5 litrə bərabərdir ki, bu da maddənin toxumalarda aşkar şəkildə birləşdiyindən xəbər verir. Vinposetinin klirensinin qiyməti (66,7 litr/saat) plazma və qaraciyərdəki qiymətdən (50 litr/saat) yüksək olur və bu, birləşmənin qaraciyərdən xaric metabolizmə uğradığını göstərir.

Xaric edilməsi: Preparatın 5 mq və 10 mq dozalarda dəfələrlə peroral qəbul edilməsi zamanı vinposetin xətti kinetika göstərir; plazmada tarazlıq konsentrasiyaları müvafiq olraq 1,2±0,27 nq/ml və 2,1±0,33 nq/ml təşkil edir. İnsanda yarımxaricolma dövrü 83±1,29 saatdır. Radioaktiv -nişanlanmış birləşmədən istifadə edilməklə aparılan tədqiqatlar zamanı aşkar edilmişdir ki, əsas xaricolma yolu 60:40% nisbətində sidik və nəcis vasitəsilə həyata keçirilir. Siçovul və itlərdə radioaktiv -nişanlanmış maddənin yüksək miqdarı öddə aşkar edilmişdir, lakin əhəmiyyətli dərəcədə enterohepatik sirkulyasiya qeyd olunmamışdır. Apovinkamin turşusu böyrəklər vasitəsilə adi yumaqcıq filtrasiyası yolu ilə xaric edilir, bu maddənin yarımxaricolma dövrü vinposetinin dozasından və istifadə edilmə üsulundan asılı olaraq dəyişilir.

Metabolizmi: Vinposetinin əsas metaboliti insanlarda 25-30% miqdarlarında əmələ gələn apovinkamin turşusudur (AVT). Peroral qəbul edildikdən sonra AVT-nin əyri altı sahəsi (“konsentrasiya-zaman”) preparatın venadaxilinə yeridilməsindən sonrakı göstəricidən iki dəfə yüksək olur və bu, AVT-nin vinposetinin sistemönü metabolozmi prosesində əmələ gəldiyini göstərir. Aşkar edilmiş digər metabolit hidroksivinposetin, hidroksi-AVT, dihidroksi-AVT-qlisinat və onların qlükuronidlər və/və ya sulfatlarla konyuqatlarıdır. Dəyişilməmiş şəkildə xaric olan, öyrənilən növlərdən istənilən birində vinposetinin miqdarı preparatın qəbul edilən dozasının yalnız bir neçə faizini təşkil etmişdir. Vinposetinin mühüm və əhəmiyyətli xüsusiyyəti qaraciyər və ya böyrək xəstəliklərindən əziyyət çəkən xəstələrdə preparatın metabolizmi və akkumulyasiyanın (yığılmanın) olmamasına görə preparatın dozasını xüsusi olaraq seçməyin vacib olmamasıdır.

Xüsusi şəraitlərdə farmakokinetik xüsusiyyətlərin dəyişilməsi (məsələn, müəyyən yaşda, yanaşı gedən xəstəliklərin olması zamanı): Vinposetin əsasən yaşlı xəstələrin terapiyası üçün göstəriş olduğundan, bu qrupdan olan xəstələrdə dərman preparatlarının kinetikasının dəyişilməsi müşahidə olunur – sorulmanın zəifləməsi, digər paylanma və metabolizm, xaric olmanın zəifləməsi- preparatın kinetikasının öyrənilməsi üzrə tədqiqatları, xüsusilə də uzun müddət ərzində qəbul edildikdə, məhz bu yaş qrupunda həyata keçirmək lazımdır. Bu cür müayinələrin nəticələri göstərmişdir ki, yaşlı insanlarda vinposetinin kinetikası vinposetinin gənc insanlarda qeydə alınan kinetikasından əhəmiyyətli dərəcədə fərqlənmir və bundan başqa, akkumulyasiya baş vermir. Qaraciyər və ya böyrək funksiyalarının pozulması zamanı preparatın adi dozalarını qəbul etmək olar, çünki vinposetin bu cür xəstələrin orqanizmində toplanmır ki, bu da preparatı uzun müddət ərzində qəbul etməyə imkan verir.

İstifadəsinə göstərişlər

Nevrologiya: Serebrovaskulyar patologiyanın müxtəlif formalarının müalicəsi üçün: keçirilmiş beyin qan dövranı pozğunluğundan (insult) sonrakı vəziyyət, vertebrobazilyar çatışmazlıq, damar demensiyası, serebral ateroskleroz, posttravmatik və hipertenziv ensefalopatiya. Serebrovaskulyar patologiya zamanı psixi və nevroloji simptomatikanın zəifləməsinə şərait yaradır.

Oftalmologiya: xorioideyanın (gözün damarlı qişası) və torlu qişanın xroniki damar patologiyasının (məsələn, tromboz, mərkəzi arteriyanın və ya torlu qişanın venalarının obstruksiyası) müalicəsi üçün.

Otorinolarinqologiya: kəskin damar patologiyasında, toksik (dərman) və ya digər mənşəli (idiopatik, səsin təsiri nəticəsində) zədələnmələr zamanı qocalıq ağır eşitmə, Menyer xəstəliyi və qulaqlarda küyün müalicəsi üçün.

Əks göstərişlər

Hemorragik serebral insultun kəskin forması, ürəyin ağır işemiya xəstəliyi, aritmiyanın ağır formaları

Hamiləlik, laktasiya dövrü.

18 yaşa qədər uşaqlar.

Təsiredici maddəyə və ya aşqarlardan istənilən birinə qarşı yüksək həssaslıq.

Preparatın uşaqlarda istifadəsi əks göstərişdir (müvafiq klinik tədqiqat məlumatlarının olmadığına görə).

Xüsusi göstərişlər və ehtiyat tədbirləri

Xəstədə kəllədaxili təzyiqin yüksəlməsi, aritmiyalar və ya QT intervalının uzanması sindromu olduqda, həmçinin antiaritmik preparatların qəbul edilməsi fonunda Kavintonla terapiya kursuna yalnız preparatın qəbul edilməsi ilə bağlı olan fayda və risklər hərtərəfli analiz edildikdən sonra başlanıla bilər.

QT intervalının uzanması sindromu olduqda və ya eyni vaxtda QT intervalının uzanmasına şərait yaradan dərman preparatının qəbul edilməsi zamanı EKQ-nəzarətin aparılması tövsiyə edilir.

Preparatın tərkibində müəyyən miqdarda sorbit olduğundan, preparatla terapiya kursu müddətində şəkərli diabetdən əziyyət çəkən xəstələrdə qanda şəkərin miqdarına nəzarət etmək lazımdır.

Xəstədə fruktoza- 1,6-difosfataza fermentinin çatışmazlığı olarsa, bu cür xəstələri bu preparatla müalicə etmək olmaz.

Təhlükəsizlik üzrə klinikayaqədərki məlumatlar

Toksikologiya

Kəskin toksiklik: Preparatın kəskin toksikliyinin öyrənilməsi üzrə tədqiqatlar siçanlar, siçovullar və itlər üzərində aparılmışdır. İtlərdə peroral median dozanı (LD50) təyin etmək mümkün olmamışdır, çünki preparatı 400 mq/kq dozada yeritdikdən sonra heyvanlarda qusma qeyd olunmuşdur.

Yarımkəskin toksiklik: Preparatın siçovullara 14 gün ərzində 8 mq/kq-a qədər, itlərə isə 28 gün ərzində 5 mq/kq dozalarda venadaxilinə yeridilməsi fonunda heç bir toksiklik simptomları müşahidə edilməmişdir. Preparatın daha yüksək dozalarda yeridilməsi zamanı ağız suyu ifrazı, ürək yığılmalarının və tənəffüs hərəkətlərinin tezliyinin artması qeyd olunmuşdur. Siçovullarda preparatın hətta 25 mq/kq dozada qəbul edilməsi fonunda yaxşı dözümlülük müşahidə edilmişdir.

Xroniki toksiklik: Xroniki toksikliyin qiymətləndirilməsinə həsr olunmuş tədqiqatların gedişində bir ildən artıq dövr müddətində təsir zamanı nə klinik, nə də laborator və ya patoloji müayinələrin məlumatları patoloji dəyişikliklər aşkar etməmişdir; məsələn, siçovullarda preparatın 100 mq/kq dozada 6-aylıq peroral terapiyası hər hansı sistem toksik effektlərin inkişafı ilə müşayiət olunmamışdır. İtlərdə iştahanın azalması və ya qusma preparatın yalnız 45 mq/kq dozada peroral qəbul edilməsi fonunda əmələ gəlmişdir. İtlərdə Kavintonun 90 gün ərzində venadaxilinə yeridilməsi zamanı əlavə klinik simptomlar (iştahanın azalması, qıcolmalar, nəbzin və tənəffüsün tezliyinin artması) preparatın yalnız 5 mq/kq dozada yeridilməsi fonunda əmələ gəlmişdir, lakin bu zaman laborator parametrlər və histoloji müayinələrin nəticələri hər hansı dəyişiklikləri əks etdirməmişdir.

Reproduktiv funksiyaya təsirin qiymətləndirilməsinə həsr olunmuş tədqiqatlar: Bu tədqiqatların nəticələrinə uyğun olaraq vinposetin erkək və dişi heyvanlarda fertilliyə təsir göstərməmişdir. Teratogen və ya embriotoksik effektlər də aşkar edilməmişdir. Vinposetinin yüksək dozalarının

qəbul edilməsi zamanı bəzi hallarda cift qanaxmaları və əsasən də cift qan dövranının güclənməsi nəticəsində düşüklər qeyd olunmuşdur. Hamilə dişilərdə vinposetinin toksik effekti preparatın əsasən venadaxilinə yeridilməsi zamanı təzahür olunmuşdur. Peri- və postnatal toksikliyin qiymətləndirilməsinə həsr olunmuş tədqiqatlarda gələcək nəsilə heç bir toksik effektlərin olduğu qeyd olunmamışdır.

Mutagenlik: Bir neçə metodlarla müəyyən olunmuşdur ki, vinposetin mutagen effekt göstərmir.

Kanserogenlik: 2 il ərzində aparılmış tədqiqatların nəticələrinə görə insanların vinposetin qəbul etməsi zamanı kanserogen riskin olmaması haqqında fikir söyləmək olar.

Digər dərman vasitələri ilə qarşılıqlı təsiri

Klinik tədqiqatların gedişində vinposetinin kloranolol və pidolol kimi beta-blokatorlarla, həmçinin klopamid, qlibenklamid, diqoksin, asenokumarol və ya hidroxlortiazidlə eyni vaxtda qəbul edilməsi zamanı bu dərman preparatları arasında heç bir qarşılıqlı təsir aşkar edilməmişdir. Alfa-metildopanın vinposetinlə eyni vaxtda qəbul edilməsi zamanı nadir hallarda bəzi əlavə effektlər müşahidə edilmişdir, buna görə də preparatların bu kombinasiyasının qəbul edilməsi fonunda arterial təzyiq üzərində müntəzəm şəkildə nəzarətin aparılması lazımdır.

Klinik tədqiqatların məlumatları qarşılıqlı təsirin baş verməsini təsdiq etməsə də, vinposetinin mərkəzi sinir sisteminə təsir göstərən dərman preparatları ilə eyni vaxtda qəbul edilməsi, həmçinin yanaşı olaraq antiaritmik və antikoaqulyant terapiyanın həyata keçirilməsi zamanı ehtiyatlı olmaq tövsiyə olunur.

Uyuşmazlıq

İnyeksiya üçün Kavinton kimyəvi cəhətdən heparinlə uyuşmur, ona görə də bu iki preparatı bir şprisdə qarışdırmaq olmaz. Lakin antikoaqulyantların yanaşı olaraq qəbul edilməsi mümkündür.

İnyeksiya üçün Kavinton tərkibində aminturşular olan infuziya üçün məhlullarla da uyuşmur, buna görə infuziyon terapiya prosesində Kavintonu tərkibində aminturşular olan infuziya üçün məhlullarla birlikdə yeritmək olmaz.

Hamiləlik və laktasiya dövründə istifadəsi

Hamiləlik və laktasiya zamanı vinposetindən istifadə əks göstərişdir.

Hamiləlik. Vinposetin ciftdən keçir, lakin ciftdə və dölün qanında ananın qanında olduğundan daha aşağı konsentrasiyalarda aşkar edilir. Preparatın teratogen və ya embriotoksik effektləri aşkar edilməmişdir. Heyvanlar üzərində aparılmış tədqiqatlar zamanı vinposetinin yüksək dozalarının yeridilməsi bəzi hallarda cift qanaxmaları və əsasən cift qan dövranının güclənməsi nəticəsində baş verən düşüklərlə müşayiət olunmuşdur.

Laktasiya. Vinposetin ana südü ilə xaric olur. Nişanlanmış vinposetindən istifadə etməklə aparılan tədqiqatlarda südün radioaktivliyi ananın qanının radioaktivliyindən on dəfə yüksək olmuşdur. Südlə 1 saat ərzində xaric olan miqdar preparatın yeridilən dozasının 0,25%-ni təşkil edir. Vinposetin ana südü ilə xaric edildiyindən və yenidoğulmuşun orqanizminə onun təsiri haqqında məlumatlar olmadığından, laktasiya dövründə vinposetindən istifadə əks göstərişdir.

Pediatriyada istifadəsi

İnyeksiya üçün Kavintonun uşaqlarda istifadəsi əks göstərişdir.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

Preparatın avtomobilləri və mexanizmləri idarəetmə qabiliyyətinə təsiri haqqında məlumatlar yoxdur.

İstifadə qaydası və dozası

Preparatın yalnız vena daxilinə tədricən damcı üsulu ilə infuziya şəklində yeridilməsi yolveriləndir (infuziyanın sürəti maksimal olaraq 80 damcı/dəqiqədən çox olmamalıdır!).

Damcı üsulu ilə infuziya zamanı başlanğıc gündəlik doza adətən 500 ml infuziya üçün məhlulda 20 mq təşkil edir. Bu doza xəstənin preparata qarşı dözümlülüyündən asılı olaraq 2-3 gün ərzində gündə 1 mq/kq-a qədər artırıla bilər.

Terapiya kursunun orta davam etdirilmə müddəti 10-14 gün təşkil edir, adi gündəlik doza – 70 kq bədən çəkisinə görə hesabladıqda, 50 mq/gün (500 ml infuziya üçün məhlulda 50 mq) təşkil edir.

Böyrək və ya qaraciyər xəstəliklərindən əziyyət çəkən xəstələrdə dozanın xüsusi olaraq seçilməsi tələb olunmur.

Preparatı əzələ daxilinə, həmçinin durulaşdırmadan vena daxilinə yeritmək olmaz!

İnfuziyon terapiya kursu başa çatdıqdan sonra xəstənin müalicəsini preparatın tablet forması ilə aşağıdakı sxem ilə davam etdirmək tövsiyə edilir: gündə 3 dəfə 1 tablet Kavinton forte və ya 2 tablet Kavinton (10 mq olmaqla 3 dəfə).

İnyeksiya üçün Kavintonu istənilən tipi fizioloji məhlulla və ya infuziya üçün qlükoza məhlulu ilə (məsələn, Salsol, Ringer, Rindeks, Reomakrodeks) durulaşdırmaq olar. İnfuziya üçün məhlul hazırladıqdan sonra 3 saat ərzində istifadə edilməlidir.

Əlavə təsirləri

İnyeksiya üçün Kavinton preparatı təhlükəsiz preparatdır; bu, on minlərlə xəstənin məlumatlarını özündə birləşdirən təhlükəsizliyin qiymətləndirilməsi üzrə tədqiqatlarla da təsdiq olunmuşdur. Bu zaman müəyyən olunmuşdur ki, daha tez-tez baş verən əlavə effektlər MedDRA təyininə görə “tez-tez baş verənlər > 1/100” kateqoriyasına düşməmişdir, başqa sözlə, meydana çıxma ehtimalı daha yüksək olan əlavə effektlər 1%-dən aşağı tezlikdə qeydə alınmışdır. Bu səbəbdən aşağıdakı cədvəldə “tez-tez baş verənlər” tezliyi kateqoriyası yoxdur.

Aşagıda sadalanan əlavə reaksiyalar orqanlar sistemi siniflərinə və MedDRA terminologiyasına uyğun olaraq baş vermə tezliyi göstərilməklə verilmişdir:

Doza həddinin aşılması

Doza həddinin aşılması halları qeyd olunmamışdır. Ədəbiyyat məlumatlarına görə preparatın 1 mq/kq dozada yeridilməsi təhlükəsiz hesab oluna bilər. Bu dozadan yüksək dozanın qəbul edilməsi haqqında məlumatlar olmadığından, preparatın daha yüksək dozalarda yeridilməsi yol verilməzdir.

Buraxılış forması

Ağ rəngli sındırma nöqtəsi olan I hidrolitik sinif qəhvəyi rəngli ampullarda 2 ml, 5 ml və ya 10 ml preparat. Plastik altlıqda 5 ampul.

1 (10 ml) və 2 (2 və 5 ml) plasttik altlıq içlik vərəqə ilə birlikdə karton qutuya qablaşdırılır.

Saxlanma şəraiti

15- 25°C temperaturda, işıqdan qorunan və uşaqların əli çatmayan yerdə saxlamaq lazımdır.

Yararlılıq müddəti

5 il.

Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

Stasionar istifadə üçün.

İstehsalçı

“Gedeon Richter” ASC

Ünvan

H-1103 Budapeşt, Demreyi küç., 19-21, Macarıstan